Egnatia po punon me kujdes në ndërtimin e skuadrës për sezonin e ri, me një synim të qartë: Të ketë të dubluar çdo pozicion në fushë. Strategjia e klubit nga Rrogozhina është të krijojë një grup të balancuar dhe konkurrues, që të mos varet nga asnjë individ dhe të jetë e mbrojtur nga mungesat për shkak dëmtimesh apo pezullimesh.Të motivuar pas rënies në Kategorinë e Parë, reagon mbrojtësi korçar: Skënderbeu nuk vdes kurrë!
VENDI – Stafi teknik, në bashkëpunim me drejtuesit e merkatos, ka hartuar një plan ku çdo rol, nga porta e deri në sulm, do të ketë dy lojtarë me nivel të përafërt. Kjo do t’i japë trajnerit më shumë alternativa dhe fleksibilitet gjatë sezonit, duke garantuar një ritëm të qëndrueshëm në paraqitjet e skuadrës si në kampionat ashtu edhe në Kupë. Krahas ruajtjes së bërthamës së skuadrës, Egnatia po mendon edhe për afrimet e reja, ku fokusi është te lojtarët me eksperiencë në Superiore, por edhe tek të rinjtë me potencial. Ky model i balancuar pritet të forcojë konkurrencën e brendshme dhe të rrisë cilësinë në çdo repart.
SHAQE – Një nga emrat që ka tërhequr vëmendjen e drejtuesve të klubit është mbrojtësi i majtë i Skënderbeut, Klevis Shaqe. 25-vjeçari ka bërë një sezon të mirë me korçarët në Kategorinë Superiore, duke spikatur me qëndrueshmëri dhe disiplinë taktike në krahun e majtë të mbrojtjes. Në Rrogozhinë po mendojnë për një alternativë të vlefshme ndaj Edison Ndrecës, i cili është një nga pikat kyçe të formacionit, por që ka pasur probleme fizike për arsye dëmtimi. Shaqe shihet si profili i duhur për të sjellë balancë dhe konkurrencë në këtë pozicion. Me korçarët ai ka luajtur 24 ndeshje në sezonin e fundit, duke qenë një nga futbollistët më stabël. Gjithsesi, mbetet për t’u parë nëse Egnatia do të shkojë deri te mbrojtësi i Skënderbeut.
ASNJË AFRIM – Merkatoja verore është hapur dhe klubet kanë nisur lëvizjet për të përforcuar grupet. Egnatia nuk ka zyrtarizuar asnjë afrim të ri, por burime pranë klubit bëjnë me dije se drejtuesit po analizojnë me kujdes tregun dhe nuk kanë ndërmend të nxitohen. Objektivi është të afrohen lojtarë cilësorë që i përshtaten filozofisë së trajnerit dhe të rrisin konkurrencën në skuadër. Pavarësisht interesit për disa emra, si dhe kontakteve të hapura në prapaskenë, Egnatia po pret momentin e duhur për të konkretizuar lëvizjet e para.
