Martina Shahinas, një vajzë 20-vjeçare nga Korça, po i jep jetë pasionit të saj për artin përmes një faqeje online me emrin @martty.pperl, ku promovon punimet e saj 100% të realizuara me dorë. Ajo krijon çanta dhe aksesorë me perla, qirinj të personalizuar me aromatizues të veçantë si dhe punime artistike me rrëshirë, duke sjellë në tregun shqiptar një frymë të re krijimtarie dhe shije estetike.
Pasioni i saj për artin ka lindur që në fëmijëri, falë talentit të saj në pikturë. Jo rastësisht, ajo ndoqi studimet në Liceun Artistik “Tefta Tashko Koço” në Korçë, ku zhvilloi më tej prirjet e saj krijuese. Aftësia për të përpunuar detajet me kujdes dhe ndjeshmëria artistike reflektohen qartë në çdo produkt që ajo krijon.
Prej një viti, Martina ka nisur këtë rrugëtim të vogël sipërmarrës, duke e kthyer pasionin e saj në një punë me potencial. Ajo beson se çdo nismë ka nevojë për kohën dhe përkushtimin e duhur për të fituar vëmendjen që meriton, dhe është e vendosur ta rrisë më tej këtë projekt të saj artistik.
Faqja e saj @martty.pperl po tërheq gjithnjë e më shumë ndjekës dhe klientë të apasionuar pas punimeve unike dhe të personalizuara. Me përkushtimin dhe origjinalitetin që e karakterizon, Martina Shahinas është një shembull frymëzues për të rinjtë që duan të ndërtojnë të ardhmen përmes pasionit dhe punës së ndershme.
