Fondacioni “Firdeus” ka njoftuar se do të marrë përsipër trajtimin e vajzës së vogël që mbijetoi nga tragjedia e rëndë, ku humbën jetën nëna dhe vëllai i saj pas një zjarri të përfshirë në banesë.
Në njoftimin e bërë publik, Fondacioni thekson se, edhe nëse ekziston qoftë edhe një shpresë e vogël për shërimin e saj, ata do të angazhohen plotësisht për ta bërë të mundur. Vajza do të dërgohet jashtë vendit për trajtim, nëse kjo do të jetë e nevojshme.
“Fondacioni Firdeus, pa bërë asnjë thirrje për kontribute, do të kujdeset për vajzën e vogël dhe do të bëjë gjithçka që ajo të shërohet. Zoti e shëroftë, ndërsa babait dhe të afërmve Zoti u dhëntë forcë për të përballuar këtë dhimbje të madhe”, thuhet në reagimin e fondacionit.
Tragjedia e rëndë ka prekur zemrat e qytetarëve në mbarë vendin, ndërsa shumë kanë shprehur solidaritetin dhe dhimbjen për familjen e viktimave.
