Korçë – Klubi Shumësportësh Skënderbeu ka bërë zyrtare goditjen e parë në merkato për sezonin e ri 2025/26 në volejbollin e meshkujve duke prezantuar pasuesin Luis Filippe, një lojtar me potencial të lartë ndërkombëtar.
Filippe, i cili do të mbajë fanellën me numrin 1, cilësohet si një organizator i shkëlqyer, me teknikë të pastër dhe qetësi nën presion, një profil ideal për të udhëhequr lojën e skuadrës korçare.
> “Me këtë afrim të ri, Skënderbeu vazhdon të ndërtojë një skuadër konkurruese dhe të orientuar drejt rezultateve. Mirë se erdhe në Korçë — aty ku pasioni për volejbollin nuk mungon kurrë,” – thuhet në njoftimin zyrtar të klubit.
Kjo është prurja e parë e bujshme e Skënderbeut në një merkato që pritet të jetë aktive dhe ambicioze, me drejtuesit dhe trajnerët që synojnë një skuadër të denjë për objektiva të lartë në kampionat.
Skënderbeu ka bërë të qartë se synon jo vetëm përfaqësim dinjitoz, por dhe ngritje cilësore, ku figura si Filippe do të jenë vendimtare për ritmin dhe vizionin e lojës.
