Klajdi Pllaha, një prej figurave më të njohura të Nismës Thurje në juglindje të vendit dhe përfaqësues i saj në Këshillin Bashkiak të Korçës, ka njoftuar zyrtarisht largimin nga kjo forcë politike. Në një deklaratë publike, Pllaha thekson se vendimi vjen pas një reflektimi të thellë mbi humbjen e idealizmit që dikur e kishte tërhequr drejt kësaj lëvizjeje.
“Në vitin 2021 hyra me idealizëm, por sot ky idealizëm është vënë në hije nga ego personale dhe papjekuri politike,” shkruan ai, duke lënë të kuptohet se zhgënjimi i tij lidhet me drejtimin aktual të partisë dhe mungesën e përfshirjes në vendimmarrje. Sipas Pllahës, ai ka qenë më shumë pranë qytetarëve sesa strukturave partiake, gjë që e ka shtyrë të vazhdojë rrugën si i pavarur.
Pllaha ka bërë të qartë se do të vijojë angazhimin në politikë si këshilltar i pavarur, duke mbetur një zë aktiv për qytetarët korçarë. Ai mbyll deklaratën me një mesazh shprese, duke besuar se Shqipëria nuk do t’i mungojë kurrë të rinjve me karakter dhe idealizëm, të cilët mund të sjellin ndryshimin.
