Drejtoria Vendore e Policisë Korçë informon se gjatë 24 orëve të fundit janë kryer disa veprime procedurale dhe operacione, në funksion të sigurisë dhe rendit publik në qark.
Specialistët e Sektorit të Narkotikëve arrestuan në flagrancë shtetasin R. S., 43 vjeç, banues në Korçë, pasi gjatë kontrollit fizik iu gjet dhe u sekuestrua një sasi lënde e dyshuar narkotike cannabis sativa. Në vijim të kontrollit në banesën e tij u gjet edhe një sasi farash të dyshuara të kësaj bime narkotike.
Shërbimet e Komisariatit të Policisë Korçë ndaluan shtetasin S. F., 33 vjeç, banues në Korçë, i cili ishte dënuar nga Gjykata e Korçës me 20 ditë burgim për veprat penale “Drejtimi i automjetit në mënyrë të parregullt” dhe “Mosbindja ndaj urdhrit të punonjësit të policisë së rendit publik”.
Gjithashtu, u referuan materialet në Prokurori dhe u shpall në kërkim shtetasi M. R., 29 vjeç, banues në Korçë, pasi dyshohet se ka ushtruar dhunë fizike ndaj bashkëshortes së tij.
Shërbimet e Komisariatit të Policisë Kolonjë referuan materialet në Prokurori ku nisi procedimi penal ndaj shtetasit E. Sh., 39 vjeç, banues në Ersekë, i dyshuar për vjedhjen e disa materialeve alumini në magazinën e një 44-vjeçari.
Ndërkohë, Shërbimet e Komisariatit të Policisë Maliq nisën procedimin penal ndaj shtetasve:
- P. H., 61 vjeç, banues në fshatin Drithas, pasi dyshohet se ka goditur me dorë një të mitur, për motive të dobëta;
- E. F., 30 vjeç, rezident në Itali, pasi dyshohet se ka kanosur nëpërmjet telefonit një 22-vjeçar, për motive të dobëta.
Në Pogradec, më datë 28.11.2025, në ambientet e jashtme të një lokali, ka ndërruar jetë shtetasi P. D., 51 vjeç, banues në Pogradec. Nga veprimet e para hetimore dyshohet se vdekja ka ardhur për shkaqe natyrale.
Materialet procedurale i janë referuar Prokurorisë së Korçës për veprime të mëtejshme.
