- Shërbimet e Drejtorisë Vendore të Policisë Korçë vijojnë punën për parandalimin dhe goditjen e veprimtarive të kundërligjshme, duke finalizuar disa raste arrestimesh, procedimesh penale dhe hetimesh.
Shërbimet e Komisariatit të Policisë Kolonjë arrestuan në flagrancë shtetasin U. Sh., 41 vjeç, banues në fshatin Cangonj, për veprën penale “Vjedhja”. Arrestimi u bë pasi ky shtetas kishte vjedhur një kartëmonedhë prej 50 eurosh në një lokal në qytetin e Ersekës. Gjatë kontrollit të ushtruar në automjetin e tij, shërbimet e Policisë gjetën dhe sekuestruan kartëmonedhën e vjedhur.
Ndërkohë, specialistët për Hetimin e Narkotikëve referuan materialet në Prokurori, ku nisi procedimi penal ndaj shtetasit J. G., 27 vjeç, banues në Korçë, pasi gjatë kontrollit fizik iu gjet dhe sekuestrua një sasi lënde e dyshuar narkotike kanabis.
Gjithashtu, më datë 06.01.2026, në banesën e shtetasit A. L., 47 vjeç, në fshatin Moravë të Korçës, janë vjedhur një televizor dhe disa vegla pune. Policia po punon intensivisht për identifikimin dhe kapjen e autorit ose autorëve të këtij rasti.
Materialet procedurale për të gjitha rastet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
