Drejtoria Vendore e Kufirit dhe Migracionit Korçë ka referuar materialet në Prokurori, ku ka nisur procedimi penal ndaj shtetasit L. S., 51 vjeç, banues në fshatin Gështenjas, Pogradec, për veprën penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”.
Si rezultat i kontrolleve të shtuara dhe analizës së riskut, në hyrje të Pikës së Kalimit Kufitar Kapshticë, shërbimet e Policisë Kufitare ushtruan kontroll në automjetin që drejtonte 51-vjeçari, ku u gjetën dhe u sekuestruan në cilësinë e provës materiale një sasi pije alkoolike (uiski), për të cilat paguhet akcizë, si dhe një sasi vajrash automjetesh dhe produkte ushqimore.
Nga verifikimet rezultoi se shtetasi L. S. nuk dispononte deklaratë doganore për mallrat e transportuara.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
