Një nga momentet më kulminante të mbledhjes në Këshillin Bashkiak Maliq ishte revolta e qytetarit Reiz Petritaj, i moshuari që me shkop në dorë iu vërsul kryetarit të PS-së në Këshillin Bashkiak që të mos e mbyllte mbledhjen, por të vazhdonte dëgjesat.
Në një prononcim, Petritaj tha se ishte i revoltuar pasi nuk dëshiron që Bashkia e Maliqit të shkrihet në bazë të propozimit të PS-së për Reformën Territoriale.
“Unë u bëra i revoltuar për arsyen sepse unë jam nga fshati Strelcë. Me kanë ikur të shumtët e njerëzve jashtë shtetit, kur i kanë mundësitë të jetojnë këtu dhe kanë dëshirë të jetojnë. Një prej mbesave kam, fëmijë s’kam se s’jam martuar, se ashtu ka qenë problemi. Problemi këtu është se korrupsioni është i pallogaritshëm. Mora vesh që mbledhja do të bëhej atje në Lozhan dhe shkova. Erdhën në Lozhan, ranë dakord të tërë në Lozhan që të mos prishet Bashkia e Maliqit.
Ashtu edhe në Libonik, kudo kështu. Tani këto lojëra se si janë, nuk e di. Unë erdha në këshill të shihja çfarë bëhej.
Kishim folur kudo që të mos prishet Bashkia e Maliqit. Këshilltarët që kishin folur andej që të mos shkrihet bashkia këtu ikën. Edhe drejt me thënë, kalova në ekstrem për moshën që kam. I shtyva kështu.
Tani problemi është se Maliqi nuk duhet të prishet. I çoj mesazh kryetarit të Parlamentit që ka bërë shumë me Bashkinë e Maliqit, që kanë bërë korrupsion me ujërat, se kanë marrë hidrocentralet, se kam kërkuar informacion për të gjitha, kam kërkuar këto që kanë bërë. Nuk e mbyllin dot. Ta dinë! U bëj thirrje edhe protestuesve që kanë dalë atje. Jam gati të vete po s’vete dot! M’u dha rasti këtu, jo m’u dha rasti se e kërkova vetë, po u them që nuk do ta gëzojë dot kryetari i Parlamentit korrupsionin që ka bërë me Bashkinë e Maliqit. Nuk e gëzon dot!”, tha Petritaj.
