Kapitenia dhe një nga figurat më të spikatura të skuadrës së volejbollit të femrave të Skënderbeut, Elena Bego, ka njoftuar largimin e saj nga klubi pas shumë vitesh karrierë dhe arritjesh të jashtëzakonshme me ngjyrat kuq e bardha.
Përmes një postimi emocional, Bego shprehu mirënjohjen e thellë për çdo moment të kaluar me ekipin korçar, duke theksuar se ndonëse ka qenë rrugë jo gjithmonë e lehtë, ajo nuk e ka lënë asnjëherë klubin në baltë. “Mbase është shumë e vështirë të shpjegosh me fjalë ndjesinë që po largohem nga ty pas kaq shumë vitesh që kemi kaluar bashkë. Vite të bukura, momente të vështira, shpeshherë mjaft dhe trishtuese, por asnjëherë unë nuk të lashë në baltë,” shkruan Bego.
Elena Bego ka qenë pjesë kyçe në rikthimin e lavdisë së Skënderbeut në volejbollin shqiptar, duke kontribuar në fitimin e 10 trofeve dhe shumë medaljeve të tjera. Ajo falënderoi drejtuesit, trajnerët, punonjësit e klubit, bashkëlojtarët dhe tifozët, duke theksuar se të gjithë kanë luajtur një rol të rëndësishëm në rrugëtimin e saj sportiv.
“Çdo moment kuq e bardhë për mua kishte emocione aq të papërshkrueshme. Do kesh gjithmonë një vend të veçantë në zemrën time dhe jetën time,” shkruan ndër të tjera volejbollistja, që i jep fund kështu një epoke të lavdishme me fanellën e Skënderbeut.
