Strukturat e Drejtoria Vendore e Policisë Korçë kanë referuar disa materiale në Prokurori për vepra të ndryshme penale, ndërsa vijojnë hetimet për dokumentimin e plotë të rasteve.
Tentativë për kalim të paligjshëm të kufirit dhe falsifikim dokumentesh
Specialistët për Hetimin e Trafiqeve të Paligjshme referuan materialet në Prokurori për shtetasin O. A., 38 vjeç, banues në Malinat, Berat, për veprat penale “Falsifikimi i vulave, i stampave ose i formularëve” dhe “Kalimi i paligjshëm i kufirit shtetëror”.
Gjithashtu, u shpall në kërkim shtetasi F. Sh., 48 vjeç, banues në Trestenik, Devoll, për veprën penale “Ndihma për kalim të paligjshëm të kufijve”.
Dy shtetasit janë konstatuar mbi fshatin Trestenik, ku Policia u ka bërë thirrje për të ndaluar. Shtetasi F. Sh. nuk i është bindur urdhrit të Policisë dhe është larguar me shpejtësi. Pas ndalimit, shtetasi O. A. ka deklaruar se do të ndihmohej nga F. Sh. për të kaluar kufirin grek kundrejt pagesës 100 euro. Gjatë kontrollit fizik atij iu gjet një pasaportë me vula të dyshuara false. Vijon puna për kapjen e shtetasit në kërkim.
Procedim për lëndë narkotike
Specialistët për Hetimin e Narkotikëve referuan materialet në Prokurori për shtetasin F. M., 19 vjeç, banues në Pirg, Maliq, pasi në fshatin Bulgarec iu gjet një sasi e vogël lënde e dyshuar narkotike Cannabis Sativa, e cila u sekuestrua në cilësinë e provës materiale.
Vetëgjyqësi dhe lojëra fati
Specialistët për Hetimin e Krimeve të Komisariatit të Policisë Korçë nisën procedim penal për:
- I. Q., banues në Korçë, pasi në lagjen nr. 18 ka penguar hyrjen në banesë të bashkëpronares Z. F., 59 vjeçe, duke ndërruar bravën e derës;
- A. K., 19 vjeç dhe J. T., 30 vjeç, banues në Korçë, pasi në një lokal në lagjen nr. 10, gjatë kontrollit të celularëve të tyre, u konstatuan faqe aktive për baste sportive. U sekuestruan 2 celularë.
Raste dhune dhe shkelje të urdhrit të mbrojtjes në Pogradec
Specialistët për Hetimin e Krimeve të Komisariatit të Policisë Pogradec referuan materialet në Prokurori për:
- K. P., 75 vjeç, banues në Pogradec, i dyshuar se ka kanosur me mjet prerës bashkëshorten, e cila u pajis me urdhër mbrojtjeje;
- F. P., 43 vjeçe, banuese në Bahçallëk, e dyshuar se ka shqetësuar vjehrrën në kundërshtim me vendimin e Gjykatës.
Gjithashtu, u referuan materiale për vlerësim pasi në rrugën “Reshit Çollaku” në Pogradec disa shtetas janë konfliktuar për motive të dobëta. Pas shoqërimit në komisariat, ata kanë hequr dorë nga ankimimi.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
Aksident në aksin “Korçë–Bilisht”
Mëngjesin e sotëm, në aksin rrugor “Korçë–Bilisht”, në afërsi të fshatit Zëmblak, Maliq, automjeti me drejtues shtetasin E. C. ka aksidentuar shtetasin Z. B., rreth 78 vjeç, këmbësor. I dëmtuari u transportua për mjekim në spitalin e Korçës.
Me drejtuesin e automjetit po kryhen veprimet procedurale, ndërsa grupi hetimor vijon punën për zbardhjen e plotë të rrethanave të aksidentit.
