shkruan Kosta Nake:
Deri në vitin 1970, banorët e fshatit Shyec siguronin ujin e pijshëm vetëm nga puset që kishte çdo familje. Pusi më i vjetër, sipas të dhënave të mbledhura nga Jetnor Hysolli, është hapur rreth vitit 1900 në familjen e Mynyr Hysollit dhe ishte tërësisht i veshur me gurë çmërç me përbërje zhavorri.
Rreth vitit 1920, pranë burimit Bushka funksiononte një mulli bloje, pronë e fisit Hysolli. Mulliri shfrytëzonte ujin që vinte nga Dulla e Rakickës, në një ujëmbledhës që në vitet me reshje mbushej deri në kapacitet maksimal.
Shyeci ka pasur disa burime natyrore të rëndësishme: • Burimi te plepat, në hyrje të fshatit
• Burimi Bushka, në veri të fshatit, me prurje sezonale nga janari deri në maj
• Burimi Sofa, që shfaqej në verilindje gjatë reshjeve të shumta dhe vazhdonte 3-4 ditë pas tyre
• Dypemeçka, gjithashtu sezonale dhe me formë përroi, e ushqyer nga shiu dhe dëbora tek rruga e Rakickës
Në vitet 1970-71, fshati pati një ndryshim të madh në furnizimin me ujë. U ndërtua rrjeti i ujësjellësit, duke shfrytëzuar burimin te plepat. Ky burim ka sasi të mjaftueshme uji për rreth 50 familje, duke i dhënë zgjidhje përfundimtare problemit të furnizimit me ujë të pijshëm.
