Bulevardi “Republika”, dikur simbol i gjallërisë dhe jetës tregtare në Korçë, sot po zhbëhet në heshtje. Bizneset po mbyllin njëra pas tjetrës: Hotel Seven, Farmacia Zavalani, një nga pasticeritë më të njohura të qytetit dhe Vila Lako nuk ekzistojnë më. Një hotel tjetër luksoz është nxjerrë në shitje.
Ky fenomen është pasojë e largimit të njerëzve, rënies së konsumit dhe mungesës së një strategjie nga pushteti lokal, që duket se ka lënë pas dore një nga arteriet kryesore të qytetit. Dikur një shëtitore plot jetë, sot “Republika” hesht, ndërsa qyteti humbet një pjesë të identitetit të vet ekonomik dhe social.
