Guri Koti ka qenë një nga fotografët më të njohur të qytetit të Korçës, por sot, pas shumë vitesh, punët e tij nuk i shohim më askund. Emri i tij është lidhur ngushtë me peizazhet e mrekullueshme të Korçës, të kapura përmes lenteve të aparatit të tij
Fotografitë e tij nuk ishin vetëm pamje të bukura, ato pasqyronin gjithashtu personalitetet dhe ngjarjet e kohës. Vajza e tij Mimoza Koti shprehet se babai ishte pasion të fotografonte gjithçka.
“Kishte pasion të jashtëzakonshëm dhe fotografonte çdo gjë. Pandi Raidhi, Koco Qëndro, Dhimitra Mele, është një portret i gruas së Themistokli Gërmenjit, në detaje ka fotografuar oborret, shtëpitë. Lulet e pemëve, të mollës, qershive, dëborën e kishte përzemër”, tha ajo.
Fotografitë e tij sot janë mbuluar nga pluhuri. Arkivi i pasur i Guri Kotit është i pahapur, dhe kjo pasuri e trashëguar ka mbetur e harruar.
Pavarësisht pasionit të tij dhe kontributit të jashtëzakonshëm në fushën e fotografisë, ai ndërroi jetë në vitin 2006, dhe që atëherë, askush nuk u kujtua për të. Askush nuk u angazhua për të realizuar amanetin e tij për dixhitalizimin e fotove, duke humbur kështu një thesaret e vërteta të artit.
“Fotografitë janë në dosje dhe është krijuar arkivi që gjatë gjithë kohës ishte gjallë e punonte. Ato thjeshte të dixhitalizohen, amaneti I babait ishin të bëhen fotografi, negativat duhet të bëheni fotografi. Jo nuk ka ardhur njeri,” shtoi Mimoza Koti.
Vajza e tij kërkon që të kujtohet emri i tij dhe të vlerësohet puna e tij. Guri Koti, një emër që do të duhej të ishte një simbol i historisë së Korçës, ende mbetet i harruar nëpër raftet e arkivave dhe kalendarët e kohës.
“Do desha te kujdeseshin, të bënin diçka të kohës, të bukur, që të dilte në pah puna e madhe, tërë jetën, që fëmijë e kishte pasion. Ishin dy fotografë kur babai ishte gjallë, Motrat Venetiku, që atëherë e me pas u dha mundësia. Fotografia atëherë ishte shumë e rrallë.
Këtu janë Dhimitër Bellovoda, Tanci, Stavri Stiko, e të tjerë të rinj, Xhimi, Eliano, pasioni që kishte donte ta përkrahnin me tërë atë pasion të madh, mirëpo janë ca gjëra që… ” tha ajo.
Fotografitë e Guri Kotit janë pasuri e qytetit të Korçës, të cilët meritojnë të jenë pjesë e trashëgimisë kulturore që të gjithë ta njohin dhe ruajnë për brezat që do të vijnë.
