Ambasadorja e Holandës në Shqipëri, Marleen Monster, ka zhvilluar një takim në Korçë me përfaqësues të organeve ligjzbatuese, ku në fokus ishte liria e medias dhe roli i sistemit gjyqësor në garantimin e saj.
Në një prononcim për mediat pas takimit, Monster komentoi edhe vlerësimin e Komisionit Evropian për Shqipërinë në raportprogresin e fundit. Ajo vlerësoi progresin e bërë nga vendi ynë, por theksoi se mbeten ende çështje që kërkojnë vëmendje dhe angazhim, veçanërisht sa i përket lirisë së medias dhe lirisë së shprehjes.
Ambasadorja u ndal edhe te lufta kundër korrupsionit dhe protestat e zhvilluara nga studentët dhe qytetarët, duke ritheksuar mbështetjen e Holandës për rrugëtimin evropian të Shqipërisë. Sipas saj, protestat janë një e drejtë themelore dhe tregojnë ekzistencën e tensioneve në shoqëri, ndërsa dhuna e shoqëruar me to është shqetësuese.
Sa i përket forcimit të shtetit të së drejtës, Monster theksoi se reforma në drejtësi ka hyrë në një fazë të re, atë të konsolidimit, ku rëndësi të veçantë ka jo vetëm kuadri ligjor, por edhe zbatimi konkret i reformave dhe përmbushja e angazhimeve të marra.
Ajo nënvizoi se Holanda do të vijojë të mbështesë procesin e integrimit evropian të Shqipërisë, duke mbajtur një qasje të bazuar në parimet e korrektësisë, drejtësisë dhe angazhimit.
