Aksident i rëndë në aksin Pogradec–Lin, një grua në rrezik për jetën
Një aksident i rëndë rrugor është regjistruar në aksin Pogradec–Lin, në afërsi të fshatit Pojskë, ku dy automjete janë përplasur kokë më kokë.
Si pasojë e përplasjes kanë mbetur të plagosur dy persona, të cilët janë transportuar me urgjencë drejt Spitalit të Pogradecit për të marrë ndihmën mjekësore.
Burime pranë spitalit bëjnë me dije se njëra prej të lënduarave, një grua, ndodhet në gjendje kritike dhe po lufton për jetën.
Policia ka mbërritur në vendngjarje dhe po punon për zbardhjen e plotë të rrethanave dhe shkaqeve të aksidentit.
