Maliq – Me tensione dhe debate është shoqëruar mbledhja e Këshillit Bashkiak të Maliqit, ku pritej të merrej një vendim lidhur me propozimin për shkrirjen e Bashkisë Maliq dhe bashkimin e saj me Bashkinë Korçë.
Këshilltarët e opozitës kërkuan votim unanim kundër ndryshimit të kufijve administrativë, ndërsa këshilltarët e mazhorancës kërkuan më shumë kohë për t’u njohur me draftligjin dhe për të diskutuar përmbajtjen e tij. Në këto kushte, mbledhja u mbyll pa një vendimmarrje përfundimtare.
Debatet vijuan edhe pas përfundimit të mbledhjes. Një prej qytetarëve të pranishëm u konfliktua fizikisht dhe shtyu kryetarin e Këshillit Bashkiak të Maliqit, Ornildi Demollari.
Deputetët e opozitës, Ledina Alolli dhe Tedi Blushi, e cilësuan mbledhjen si të zhvilluar sipas një skenari dhe bënë thirrje për reagim qytetar kundër propozimit për shkrirjen e Bashkisë Maliq.
Ata ngritën pikëpyetje mbi qëndrimin e deputetëve socialistë dhe kërkuan që banorët e Maliqit të informohen dhe të dëgjohen përpara çdo vendimi.
Gjatë ditëve të fundit janë zhvilluar dëgjesa publike në njësitë administrative të Bashkisë Maliq, ku, sipas diskutimeve të zhvilluara, shumica e qytetarëve janë shprehur kundër bashkimit me Bashkinë Korçë.
Ndërkohë, përfaqësuesit socialistë të Bashkisë Maliq nuk kanë bërë ende publik një qëndrim përfundimtar lidhur me propozimin për ndryshimin e kufijve administrativë.
Mbledhja e radhës pritet të përcaktojë nëse Këshilli Bashkiak do të marrë një vendim zyrtar për këtë çështje.
