Ministria e Bujqësisë ka në dorë projektligjin për sigurimin e detyrueshëm në bujqësi. Grupi i punës në ministri po punon detajet e fundit të draftit dhe brenda pak ditësh projektligji do të hidhet për konsultim publik.
Përballë çdo situate përbytjesh, zjarresh apo ngricash, fermerët ankohen për prodhimin që ju ikën dëm. Në këtë situatë, prej vitesh bëhet diskutimi për sigurimin e detyrueshëm në bujqësi, që do të kompensonte fermerët kur përballen me probleme prej fenomeneve natyrore.
“Shumë shpejt publiku do të njihet me draftin e parë të ligjit për sigurimet në bujqësi, do të mundësojë një paketë sigurimesh që u përgjigjet nevojave dhe kërkesave të fermerëve, bazuar në problematikat e evidentuara vitet e fundit për fermerët, ku fenomene të caktuara natyrore krijojnë dëme, ndonjëherë edhe të konsiderueshme te fermerët e të gjithë kategorive”, tha Irfan Tarelli, drejtor i Politikave Bujqësore, Ministria e Bujqësisë.
Sigurimi i fermerëve do të bëhet sipas modelit turk. Sipas këtij modeli, fermeri do të paguajë vetëm një pjesë të primit të sigurimit.
“Ky ligj do të bëjë të mundur futjen e një skeme të re sigurimi në bujqësi, ku një pjesë e konsiderueshme e primit të sigurimit do të mbulohet nga shteti”, tha Tarelli.
Sipas informacioneve, do të ketë disa lloje sigurimesh në bujqësi, në varësi të kulturave, ndërsa aktualisht po diskutohet edhe sa do të jetë pjesa që do të mbulojë shteti te primi i sigurimit, që mund të arrijë deri në 70% të shumës.
