Shoqata e Pëllumbave në qarkun e Korçës vijon të ruajë një nga traditat më të veçanta sportive në vend, garat me pëllumba sportivë, aktivitet që zhvillohet që prej vitit 2003 dhe ka fituar gjithnjë e më shumë pjesëmarrës vitet e fundit.
Këtë fundjavë është çelur gara e radhës, ku rreth 450 pëllumba nga Korça dhe qindra të tjerë nga qytete të ndryshme të Shqipërisë po përshkojnë një distancë prej rreth 240 kilometrash, duke u nisur nga Prishtina.
Sipas organizatorëve, koha mesatare e mbërritjes llogaritet rreth 2 orë e 30 minuta, ndërsa çdo pëllumb monitorohet përmes çipave identifikues që regjistrojnë saktësisht kohën e kthimit.
Pjesëmarrës me përvojë si Seladin Mema dhe Sotiraq Vesho theksojnë se suksesi në këtë sport kërkon përgatitje të gjatë dhe përkushtim maksimal.
Garat e pëllumbave sportivë po shihen gjithnjë e më shumë si një traditë sportive e veçantë dhe në rritje në Shqipëri.
