Policia e Korçës ka ndaluar një 62-vjeçar të shpallur në kërkim për dhunë në familje dhe shkelje të vendimit të gjykatës.
Shërbimet e Komisariatit të Policisë Korçë kapën dhe ndaluan shtetasin P. M., 62 vjeç, banues në fshatin Liqenas, Pustec. Ai ishte shpallur në kërkim për veprat penale “Dhuna në familje” dhe “Veprime në kundërshtim me vendimin e gjykatës”, pasi dyshohet se ka ushtruar dhunë ndaj bashkëshortes së tij, e cila ishte e pajisur me urdhër mbrojtjeje, si dhe ndaj djalit të saj.
Po ashtu, materialet u referuan në Prokurori për një 17-vjeçare, banuese në Korçë, për veprën penale “Kanosja për të mos kallëzuar”. Ajo dyshohet se ka kanosur me telefon një 14-vjeçare, që të tërhiqte kallëzimin e bërë ndaj një shoqeje të saj, me të cilën kishte pasur konflikt.
Ndërkohë, specialistët për Hetimin e Krimeve të Komisariatit të Policisë Pogradec referuan materialet në Prokurori dhe nisi procedimi penal për shtetasin D. B., 46 vjeç, banues në Pogradec, drejtues teknik në një subjekt për instalimin e paneleve fotovoltaike. Ai dyshohet për veprën penale “Shkelja e rregullave të mbrojtjes në punë”, pasi për shkak të mungesës së masave të sigurisë është dëmtuar në dorë gjatë punës një punonjës i subjektit, shtetasi F. M., 36 vjeç.
Në një tjetër rast, Policia bëri me dije se shtetasi R. J., 41 vjeç, banues në Korçë, i cili ishte larguar nga banesa më 24 shkurt, është gjetur dhe është rikthyer pranë familjes.
Ndërsa mëngjesin e sotëm, në spitalin e Prrenjasit është dërguar pa shenja jete shtetasi G. Gj., 47 vjeç, banues në fshatin Rodokal i Sipërm, Pogradec. Nga hetimet paraprake dhe deklarimet e familjarëve dyshohet se ai, në gjendje të rënduar psikologjike, ka konsumuar lëndë helmuese në banesë dhe për pasojë ka humbur jetën.
Grupi hetimor vijon punën për dokumentimin e plotë të shkakut të humbjes së jetës dhe rrethanave të rastit.
