Shërbimet e Komisariatit të Policisë Korçë arrestuan në flagrancë shtetasin E. K., 46 vjeç, banues në Korçë, pasi gjatë kontrollit fizik të ushtruar në lagjen nr. 4 të qytetit, iu gjetën dhe sekuestruan, në cilësinë e provës materiale, dy mjete prerëse (thika), të cilat i posedonte pa leje.
Gjithashtu, u referuan materialet në Prokurori dhe nisi procedimi penal për shtetasit V. Z., 62 vjeç dhe M. Z., 23 vjeç, banues në Korçë, pasi dyshohet se në lagjen nr. 17 kanë goditur fizikisht një 13-vjeçar, për motive të dobëta.
Ndërkohë, shërbimet e Sektorit të Qarkullimit Rrugor referuan materialet në Prokurori, ku filloi procedimi penal për shtetasin A. Gj., 26 vjeç, banues në Pukë. Ky shtetas dyshohet se, në afërsi të fshatit Rëmbec, Maliq, duke drejtuar automjetin, ka humbur kontrollin mbi mjetin dhe për pasojë automjeti ka dalë nga rruga. Si pasojë e aksidentit janë dëmtuar drejtuesi i mjetit dhe pasagjerët, shtetasit P. Gj., 54 vjeç, banues në Pukë dhe D. Gj., 26 vjeçe, banuese në Fushë-Arrëz, të cilët u transportuan në spital për ndihmë mjekësore.
Po ashtu, shërbimet e Komisariatit të Policisë Pogradec referuan materialet në Prokurori dhe nisën procedimin penal për shtetasin A. G., 54 vjeç, banues në fshatin Buçimas, Pogradec, pasi gjatë kontrollit në lokalin e tij u konstatua se ushtronte aktivitetin pa dokumentacionin përkatës.
Të gjitha materialet procedurale iu referuan Prokurorisë së Korçës për veprime të mëtejshme.
