Varësia nga droga, veçanërisht nga substancat e forta, vijon të mbetet një nga problematikat më shqetësuese në qarkun e Korçës.
Edhe pse qendra e detoksikimit në këtë qark funksionon dhe trajton çdo ditë dhjetëra persona që kanë krijuar varësi, numri i tyre krahasuar me përdoruesit realë mbetet ende i ulët. Megjithatë, edhe të regjistruarit që kërkojnë ndihmë po shtohen vit pas viti, çka tregon një ndërgjegjësim më të madh për t’u përballur me problemin.
Një tjetër shqetësim që vihet re së fundmi është ndryshimi i tendencës së përdoruesve, ku tashmë zonat rurale përbëjnë pjesën më të madhe të atyre që vuajnë nga varësia, në krahasim me qytetet.
Ekspertët e shëndetit publik theksojnë se nevojitet më shumë punë parandaluese, edukim në shkolla, si dhe mbështetje psikologjike dhe sociale, në mënyrë që fenomeni të mos përhapet më tej, sidomos tek të rinjtë.
Në një kohë kur përdorimi i substancave narkotike po shtrihet në shtresa të ndryshme të shoqërisë, bashkëpunimi mes institucioneve, familjes dhe komunitetit mbetet kyç për ta frenuar këtë plagë sociale që po prek gjithnjë e më shumë edhe zonat e thella të qarkut të Korçës.
