Në kuadër të dy investimeve të rëndësishme që po realizohen në zonat e Libonikut dhe Maliqit, ka vijuar me intensitet puna për lirimin e hapësirave publike të zëna në mënyrë të paligjshme. Aksioni është ndërmarrë nga strukturat përkatëse të bashkisë, në bashkëpunim me Policinë Bashkiake dhe institucionet vendore.
Ky proces është pjesë e një plani më të gjerë zhvillimi urban dhe infrastruktural, që synon jo vetëm përmirësimin e jetës së banorëve, por edhe krijimin e kushteve për një zhvillim të qëndrueshëm dhe të organizuar të territorit.
Autoritetet vendore kanë falënderuar banorët për mirëkuptimin dhe bashkëpunimin e treguar gjatë këtij procesi, duke theksuar rëndësinë e ndërgjegjësimit qytetar për ruajtjen dhe mosuzurpimin e hapësirave publike.
“Le të jetë ky një moment reflektimi për të gjithë ata që kanë zënë hapësira publike. Lirimi vullnetar është hapi i parë drejt respektimit të ligjit dhe kontributit në zhvillimin e përbashkët të komunitetit,” thuhet në deklaratën zyrtare të Bashkisë Maliq.
Procesi do të vijojë në ditët në vijim, duke përfshirë edhe zona të tjera të njësive administrative, sipas një kalendari të miratuar nga autoritetet vendore.
