Pas përfundimit të numërimit të votave për kandidatët në zgjedhjet e 11 majit, një prej surprizave më të këndshme në radhët e Partisë Demokratike në Qarkun e Korçës ka qenë rezultati i arritur nga një prej kandidatëve më të votuar: me 5206 vota, ai renditet i dyti mes gjithë kandidatëve demokratë në këtë qark.
Në një mesazh falënderues ndaj qytetarëve, ai shprehet thellësisht mirënjohës për çdo votë dhe për mbështetjen e treguar gjatë një fushate intensive që zgjati rreth 40 ditë.
“Faleminderit nga zemra për çdo votë, për mbështetjen ndaj emrit tim, për besimin, për bisedat që kemi zhvilluar së bashku, për takimet me orë të gjata,” shkruan ai, duke theksuar gjithashtu sakrificat personale dhe mungesën që i ka shkaktuar familjes gjatë kësaj periudhe të angazhimit politik.
Ai vlerëson se kjo fushatë ishte një përvojë e vlefshme dhe ndriçuese, e cila i dha mundësinë të njihte më mirë qytetarët, të ndërtonte lidhje të reja dhe të thellonte ato ekzistuese. Në thelb të angazhimit të tij, thotë se ka qenë përpjekja për të bërë një fushatë dinjitoze, pa fyerje, e orientuar drejt rritjes së mbështetjes për Partinë Demokratike.
“Gjatë gjithë fushatës u përpoqa të isha vetvetja… rrethuar me njerëz me reputacion dhe të respektuar për komunitetin”, thekson ai, duke shprehur zhgënjimin që jo të gjithë kandidatët demokratë ndoqën të njëjtin standard, duke promovuar më shumë interesat individuale të listës së hapur sesa ato të partisë.
Në përmbyllje, ai garanton se do të mbetet i njëjti njeri – i përkushtuar për komunitetin, për Korçën dhe për Shqipërinë.
“5200 falënderime për secilin prej jush, jam mirënjohës në pafundësi për besimin e dhënë,” përfundon ai mesazhin e tij.
