30 vite më parë, në aeroportin e Rinasit, me këtë avion mbërritën në atdhe eshtrat e një prej figurave më të mëdha të kombit shqiptar, Faik Konicës. Ky moment historik u bë i mundur falë angazhimit të 22 shqiptarëve nga mbarë trojet shqiptare, të cilët jetonin në Shtetet e Bashkuara të Amerikës dhe u bashkuan për të përmbushur amanetin e Konicës.
Njëri prej kontribuuesve për kthimin e eshtrave në Shqipëri është edhe Beqir Potka, i cili rrëfen përkushtimin dhe gatishmërinë e bashkatdhetarëve për realizimin e këtij misioni. Ai thekson se, ndonëse kanë kaluar tre dekada, ndjen kënaqësi që ky akt po përkujtohet sot. Sipas tij, mes 22 kontribuuesve ishin edhe tre korçarë, ndërsa të tjerët vinin nga Shqipëria, Kosova dhe Maqedonia e Veriut. Potka shprehet se ardhja e eshtrave të Konicës në atdhe ishte një dëshirë e hershme e tij, e cila u realizua pavarësisht mungesës së mbështetjes shtetërore ndër vite.
Me rastin e 83-vjetorit të ndarjes nga jeta të Faik Konicës, Fakulteti i Edukimit në Universitetin e Korçës organizoi një simpozium përkujtimor, ku morën pjesë studiues, historianë, pedagogë dhe përfaqësues të institucioneve të ndryshme.
Për Eris Rusin, përgjegjës i departamentit në Fakultetin e Edukimit, Faik Konica mbetet një nga figurat më emblematike të historisë shqiptare. Ai vlerëson se Konica ishte një mendje e ndritur dhe një personalitet erudit, që ka lënë gjurmë të thella në historinë e kombit, duke theksuar se figura dhe vepra e tij duhet të jenë më të pranishme në edukimin e brezave të rinj.
Në një përvjetor të tillë, u theksua nevoja për më shumë aktivitete shtetërore, pasi figura e Faik Konicës i kalon kufijtë e gjithë shqiptarisë dhe përfaqëson vlera kombëtare e universale.
